Сè започнало со заборавен паричник.

Во 1949 година бизнисменот Френк Макнамара, додека е на вечера во еден ресторан во Њујорк, забележува дека паричникот го заборавил во друг костум. Сметката ја платила неговата сопруга, а тој решава никогаш повеќе да не му се повтори истата непријатност. Во февруари следната година, Френк заедно со својот партнер Ралф Шнајдер се вратиле во истиот ресторан и кога требало да ја плати сметката, Френк ја извадил малата картонска Diners Club картичка и се потпишал за трошокот. Во бизнисот со кредитни картички овој настан е познат како „Првата вечера“.

Основана во 1950 година во Њујорк, САД, Diners Club е првата кредитна картичка и алтернатива за безготовинско плаќање во светот. Само една година подоцна има 20.000 членови кои можат да ја користат во преку 1 000 продажни места во Соединетите Американски Држави. Веќе во 1955 Diners Club картичката е прифатена во над 20 земји во светот и има повеќе од 200.000 членови. Мрежата на Динерс Клуб расте со огромна брзина, па во 1967 картичката се употребува во 130 земји, повеќе од постојаните 123 членки на Обединетите нации во тоа време. Во 1969 година, Diners Club е првата платежна картичка во Русија. Во 1978 година – ја користат 3,5 милиони членови во 400.000 продажни места насекаде во светот.